Forsking på metodar for depresjonsscreening som er meint å oppdage og følgje opp depressive symptom hos gravide og barselkvinner, skal systematisk oppsummerast. I oversikta skal ein også vurdere kor treffsikre, det vil seie kor nøyaktige, dei ulike screeningverktøya er i høve til ein faktisk depresjonsdiagnose.

 

- Målet med screening er å kunne iverksetje tiltak på eit tidleg stadium for å førebyggje utvikling av klinisk depresjon, seier Marita Sporstøl Fønhus, forskar ved Kunnskapssenteret og leiar for dette prosjektet.

 

Det er Nasjonalt råd for kvalitet og prioritering i helsetenesta som har bede Kunnskapssenteret om å utarbeide oversikta. Bakgrunnen for bestillinga er at rådet har vedtatt å drøfte om ein skal tilrå innføring av depresjonsscreening av gravide eller barselkvinner .

 

- Den systematiske oversikta over forsking på dette området skal danne bakgrunn for rådet sitt vidare arbeid med dette spørsmålet og bidra til velinformerte avgjersler, avsluttar Fønhus.